തൃശൂർ: കാലിക്കട്ട് യൂണിവേഴ്സിറ്റിയുടെ കീഴിൽ മണ്ണുത്തി ഡോണ്ബോസ്കോ കോളജിൽ നടന്നുകൊണ്ടിരിക്കുന്ന ബിഎ ക്രിസ്ത്യൻ സ്റ്റഡീസിൽ ആദ്യ ബാച്ച് വിജയകരമായി പുറത്തിറങ്ങി. കേരളത്തിൽ ഇദംപ്രഥമമായാണ് ക്രിസ്ത്യൻ പഠനശാഖയിലും ദൈവശാസ്ത്രത്തിലും ബിരുദപഠനം നടക്കുന്നത്.
ദൈവശാസ്ത്ര വിഷയങ്ങളോടൊപ്പംതന്നെ മാനേജ്മെന്റ് സ്റ്റഡീസ്, ഭാരതസംസ്കാരം, കേരള നവോത്ഥാനം, വിമൻ സ്റ്റഡീസ്, മാനസികാരോഗ്യം, പരിസ്ഥിതി ആധ്യാത്മികത തുടങ്ങിയവയും പഠനവിഷയങ്ങളാണ്. ഈ ബിരുദത്തിനുശേഷം എംഎസ്ഡബ്ല്യു, ഇംഗ്ലീഷ് സാഹിത്യം, സാന്പത്തികശാസ്ത്രം, ചരിത്രം, സോഷ്യോളജി, പൊളിറ്റിക്കൽ സയൻസ് തുടങ്ങിയ മാനവികവിഷയങ്ങളിൽ ബിരുദാനന്തര പഠനത്തിനും വിദ്യാർഥികൾക്ക് അവസരം ലഭിക്കും. സാമൂഹ്യശാസ്ത്രത്തിൽ ബിഎഡ് പഠനത്തിനും ബിഎ ക്രിസ്ത്യൻ സ്റ്റഡീസ് യോഗ്യത നൽകുന്നു. കൗണ്സലിംഗ് മേഖലയിലും അധ്യാപനരംഗത്തും ജോലി ആഗ്രഹിക്കുന്നവർക്ക് ഈ ഡിഗ്രി കോഴ്സ് ഏറെ അഭികാമ്യമാണെന്നു കാലിക്കട്ട് യൂണിവേഴ്സിറ്റി ക്രിസ്ത്യൻ ചെയർ ഡയറക്ടർ ഫാ. ഡോ. പോൾ പുളിക്കൻ അറിയിച്ചു. പിഎസ്സി പരീക്ഷയിൽ പങ്കെടുക്കുന്നതിന് അടിസ്ഥാനയോഗ്യതയായി ഈ ഡിഗ്രി അംഗീകരിക്കപ്പെട്ടിട്ടുണ്ട്.
ബിഎ ക്രിസ്ത്യൻ സ്റ്റഡീസ് വിജയകരമായി പൂർത്തിയാക്കുന്നവർക്കു കരിയർ പ്ലേസ്മെന്റിന് തൃശൂർ അതിരൂപതയുടെ സമുദായ-യുവജന ശക്തീകരണസംരംഭമായ ഏദൻ എംപവർമെന്റ് ഇനിഷ്യേറ്റീവ് അവസരമൊരുക്കും. അർഹരായവർക്കു ഡിഗ്രി പഠനത്തിനു കാലിക്കട്ട് യൂണിവേഴ്സിറ്റി ക്രിസ്ത്യൻ ചെയർ സ്കോളർഷിപ്പ് നൽകും.
പ്രായപരിധി തടസമല്ല എന്നതാണ് ഈ കോഴ്സിന്റെ സവിശേഷത. ഉന്നതപഠനം ആഗ്രഹിക്കുന്ന യുവജനങ്ങൾക്കും പഠനം ഒരിക്കൽ മുടങ്ങി വീണ്ടും പഠനരംഗത്തേക്കു മടങ്ങിയെത്താൻ ആഗ്രഹിക്കുന്നവർക്കും വീട്ടമ്മമാർക്കും ഈ കോഴ്സ് ഡിഗ്രി പഠനത്തിന് അവസരം ഒരുക്കുന്നു. വിശുദ്ധ ഗ്രന്ഥത്തെയും ദൈവശാസ്ത്രത്തെയും കൂടുതൽ ആഴത്തിൽ മനസിലാക്കാൻ ആഗ്രഹിക്കുന്ന ഏവർക്കും ഈ കോഴ്സിൽ പ്രവേശനം നേടാം. സമർപ്പിതരംഗത്തു പരിശീലനം നൽകുന്നവർക്കും ഈ കോഴ്സ് ഏറെ ഉപകാരപ്രദമാണ്. താത്പര്യമുള്ളവർ എത്രയും വേഗം ഡോണ് ബോസ്കോ കോളജ് അധികൃതരെ സമീപിക്കണം.
E-paper LOGIN
LOGIN
